Star Suss-DAVE KELLY! BABY CHAM! PLEASE! LAWD! MI EARS!













Dave kelley an Baby' Cham dere is no way people can put out one riddim and not one song offa di riddim worthy fi listen more dan one time. Dat nuh mek sense. Mi say it bout Stronger, most people agree and some vex. See it deh. Di song release di odda day an dead like Miss Mattie one foot fowl right afta.

Di new Cham track wha name Dat Mi Seh, mi tune out aftah 30 seconds. Tump Mi Inna Mi Mout wid him and Timberlee, fi har part ah di song harrible buck, so di song shudda done at 46 seconds. Pinchers Amazing alright fi di fuss 25 seconds. Bounty Killer Enemies, lawd have mercy! Yuh can tell me why Killa a deejay like Cham?

Some ah oonu questions answered:
Reader: Cherry I don't know why Nikki Z don't just stay weh she deh cuz nuh body neva miss har an the idiot song weh she do bout bellyring.


Me: My gaaaawd! What a piece a rage. Hahaha. Yuh know say me neva mind har to be honest. She did have a vibe. Likkle aftah she left, we did feel a void, especially when we did haffi a deal wid Rose. But afta a while, ah guess wha dem say: outta sight, outta mind. So when she come back pon the new radio station dem a come wid, we juss haffi see how she fill een again.
Reader: Hi Cherry, I am not a fashionista but I am truly concerned about the condition of the Fiwi Choice presenters (if they can be described as that). To add insult to injury they have the nerve to announce that their outfits and hair done by ... (whichever, whomever). The whole programme needs someting. Trus mi. The week after Gregory's funeral, one of the girls stated that the reason for requesting black and white at his funeral was linked to his choice of wives. Tasteless beyond belief!
Me: Smaddy can tell me when di programme come on so me can watch please? Because so much people cyaan deh say di same ting an a lie.


Reader: Bridgez and Killa really deh fi true?
Me: Dat a did di rumour up to wah day, but me nuh know fi sure.
Reader: A who name Bridgez??? She have fans an songs an me neva hear bout she, mi mussi a cave woman.
Me: A me fi tell yuh! Me did haffi do one SERIOUS Internet search!
Reader: A must Lisa Hyper did send that message herself about being a motivation. (Kiss my teet). A don't know whe she fa.
Me: Lawd have mercy! No sah, yuh bad like yaawz.
Alright, suss time!
GONE AT LAST!
Is not like me a celebrate, but me have a big smile. Hahaha. Me nevah have nutten gainst Rose as a person, but she did boring and nevah have deh radio vibe deh at aaaall. So me so glad say she gone offa Zip yah now. First Phat Kat, now she. Wha yuh say ZJ Rush? Dem tings yah happen in threes enuh. Yuh nuh feel a time fi move on to greener pastures too?
A JUSS LIFE
People, oonu tek een Irie website wid di big tracing match between di fan dem bout G-Whizz? Mi laugh till me nearly keel ovah. One woman compliment him and it tun inna big war, ovah who nuh want him and who want him. Dem nearly tear off di woman clothes ovah di Internet say she a groupie cause she like him. Mi always tink it fool fi people a trace ovah Internet an dem ting deh. Wha oonu a do fi show di rage? Type hard? No sah. It serious.

THE CONTROVERSY
Mi hear a big controversy inna di streets wid di old producers versus di new one dem especially Stephen. Everyday dem siddung pon Stephen name like a 500 pound mampy, say him a di main one who a change di sound a di music. Oonu can go foreign an tell people fi still only a listen to Flavor Flav, Run DMC, Ice T and Naughty By Nature? Dung to classical music see changes. Please look pon di artistes who manage fi change wid di music but still keep certain original musical traits. Dem deh a di people who remain on top fi years.

IF YUH NUH SALT SUMMEN WRONG
Mavado, deh picture deh wha me see wid di man a do deh summen deh, and people ah spread rumour say ah you, no sah. Everyday is a struggle to neck back. But how people so wicked, me all see show promoter a send out di link wid di pictuh. Dem nuh see say ah nuh you? Not one chop or dig out nuh inna dat deh man face. Dem nuh realise? And a nuh so yuh side view look eida.
Fuss no permit fi keep yuh show aftah how much advertisement, now dis. David, yuh evah watch Beloved wid Oprah Winfrey yet, when di woman dem haffi come ah har yawd gate and sing hymns and chant? A dat we haffi go do. Gadda up some Alliance and Gully man inna full black and come a yuh gate and squeeze lime and use soda wata and do prayer circle and pure summen. One smaddy cyaan have so much crosses all a di time. No sah.
SPEAKING OF MAVADO

Mavado - File
People mi need fi ask a serious question. And me need oonu fi ansah. Di whole a we siddung a have deh convo yah bout him di odda day and Kaboom mek a valid point. She a say if ah did when him used to go roun' a gih pure trouble inna di industry yuh cudda see why everyday is a different fight. One day him wanted and lock up fi days, one next time di man waah keep show an mek back some money an party wid him fans cause dem tek whe him visa, dem say shut him dung pon dat too. Wha di man fi do? Start tief? Tun back barber?

If di man decide fi tek himself outta drama and even go as far as fi change di direction of him lyrics because everybody did a attack him, it come een like it did pointless. Because inna di end, him nuh win nuttin, him still a lose. So people in authority need fi careful a di message dem send to di artiste dem. Yuh cyaan ask dem fi change and den still a bar dem prosperity. Dat cyaan mek sense.


 source: the Jamaican star

Comments

Popular posts from this blog

10 Crazy things women do for men

MAN SHORTAGE AFFECTS CHURCHES IN JAMAICA - Christian women complain of lack of potential husbands