Miss Kitty Clear up your bills-A soon 2011 and some people still cyaa seem fi change dem dutty ways, turn over a new leaf and start mek dem way to the right path.

A soon 2011 and some people still cyaa seem fi change dem dutty ways, turn over a new leaf and start mek dem way to the right path. When it comes to paying bills and repaying, some poeple have no God Almighty integrity or sense of responsibility and dat just aggravate mi spirit! Some tek it as a habit fi no tek care a dem responsibility and seem to not even have a conscience when it comes to keeping their end of the bargain. Many times is not even seh dem cannot pay dem bills or repay dem loan , but because dem don't set dem priority straight, dem eva inna bangarang. Real big people have real responsibilities which they must stand up to. When it comes to bills like light, wata an rent dem ting deh haffi sort out. Dem cyaa expect fi use di people dem amenities and no pay a dolla towards them! Times rough and hard fi everybody but dignity and pride fi pay yuh bills is not negotiable. Picture working hard fi a month an when month end come yuh boss tell yuh seh him a run short dis month and won't able fi pay yuh yuh salary. Mi know nuff people woulda ignorant and class up di boss and talk di tings dem! So if people expect fi live free, buy a home sweet home lamp, bathe a river or find somewhere fi live dat is within your reach. Some waa live inna dear place and cannot afford it! Stop put yuh basket higher dan weh yuh can reach cause if cow no know how him behind set den no swallow orange! Some wi seh dem cyaa pay fi dis an dat yet dem a throw man pardna an naa get no draw or a invest dem money inna hairy bank an bruk like church mouse! Most people dream fi own dem owna house one day but until dat time rent haffi pay. Paying rent is also a good indication of how yuh a go deal wid yuh mortgage and if yuh cyaa pay dat pon time rest assure seh bank no inna no long talking wid no bwoy nor no gal! So it good fi bruk yuhself into honouring your obilgations on time. Yuh rent cyaa due di 15 th and yuh start hustle di money on di 14 th; a problem yuh a bring pon yuhself. Rent is an expected expense that must be budgeted for and set aside caw yuh haffi have a roof over yuh head especially if yuh have pickney. Some woman have some big greytone man inna dem bed who nyam and drink dung di place and naa contribute a dolla to nutten at all! Some woman see man nice house and well want key and cyaa even find di fus dolla fi go cut di key! Dem a freeloada! Free a dem fus, miggle an las name! Anybody can late sometimes but cyaa late all di time! Is like some people tek pride in being late and dem need fi stop it. Sacrifice fi survival Sacrifice fi survival is a must until yuh set yuhself inna life and no haffi worry bout certain tings. When it come to pinching and squeezing and know how fi ban yuh belly fi mek ends meet, we haffi do wah we haffi do. Yuh cyaa owe people dem money and a party day and night, yuh cyaa owe yuh rent but a buy flat screen TV, yuh cyaa waa borrow people money an waa tek plane like taxi or owe light and wata an a buy new clothes! Life no work so and when people a go class yuh and chat yuh, yuh seh dem wicked but a yuh wicked to yuhself! Nothing in life comes easy and even if it comes easy, it have a way of leaving easy, but when yuh wuk hard and live up to yuh responsibility mi feel seh God will help when him see yuh a try. Yuh cyaa waa teef an lie and when yuh fi pay back di people dem money a pure long excuses: yuh modda sick; yuh house jus bun dung; yuh jus buck yuh toe or a helicopta jus drop inna yuh head jus chu yuh no waa pay back wah yuh owe! When some people owe yuh dem have excuse pon cock! As yuh see dem, dem a dash it pon yuh without warning and really an truly di people dem jus want back dem money. Sometime to wah dem borrow di money fi do was totally unecessary an a jus chu dem nuff why dem inna money payback problem! Some a dem want fi all malice and fight off di people dem an a buss libaty when a dem a di chink! Whether di money big or small is the principle dat matters. Bills and debt fi pay even if yuh haffi go without! So before nuff a unnu go buy up all kind a Christmas bashment mek sure unnu bills pay and if unnu owe nobody clear up di bills or at least pay a likkle ting pon wah unnu owe so unnu can enter 2011 pon a clean slate. You never know when you may need to borrow again so don't burn your bridges and mek sure your accounts in good order so dat if yuh in need smaddy can help yuh cause dem know you are a man or woman of your word and wid principle. Send comments to