Stacious an Bridgez mix-up 2011

Stacious an Bridgez

Puppa Jeezas!!! A how di drama between Stacious an Bridgez tun up suh??!! Nooooo sah!!! Unu know say dem done naa gree fram long time because of several different reasons relating to Gully an Alliance. Fi who doan know, Stacious a First Lady inna di Gully Crew led by Mavado, while Bridgez say say she a First Lady inna di Alliance led by Bounty. But because a Bounty bust Mavado an di Gully Crew, it is generally viewed dat di Gully Crew is a part of Alliance, hence di term used by some 'Gulliance'.

But di friction between Stacious an Bridgez guh tun up wen di likkle drama did kick off wa day between Bounty an Mavado, wid di shooting an death a Killa pawty an di song weh Mavado cousin, Chase Cross, do a diss Bounty. While it look like Killa an Vado cool ya now, di same cannot be said for Stacious an Bridgez. Mi a get all kinda stories weh some a say a Stacious a falla it up, an some a say a Bridgez. Some people all a spread talk seh because Vado choon dem a shell dung di place Bridgez waan come quietly to him, an mi hear say Stacious naa feature dat!! In any case, mi nuh tink Vado woulda like Bridgez cause him respek an rate Killa, an it a rinse a road seh Killa an Bridgez ... ahem!!...Raga whistling innocently.



But pon di real, di latest drama kick off wen pitcha did a tek a HYPE TV fi di artist dem pon di Bedroom Ridim, an somehow Bridgez mussi guh end up a bounce Stacious neatly. Likkle kicking off gwaan an dem rush dem one anneda, at which point smaddy who a part di fight hol Stacious, an dis allow Bridgez fi get een couple slaps pon Stacious. But Stacious go outside guh lay-wait Bridgez, an wen shi calla har it neva pretty. Stacious mussi did tink say har han dem a drum sticks an Bridgez face a drum, cause Stacious jus' staat reel out a whole heap a blows in rapid succession to Bridgez face!! Shi did jus' a beat Bridgez face suh like wen farmer a mawta corn! But Bridgez fight back an grab up Stacious hair an try fi get een some punch an craab, but dem neva really connect. Dat ongle mek Stacious get wussarra mad an staat batta Bridgez some more like wen Reggae Boyz a kick ball!!

Me nuh really know di hundred pon Bridgez, shi new pon di scene. But di whole a wi know Stacious long time, an is a girl weh wi lowe out certain tings and ignore drama. But if yuh keep on a badda har shi a guh get bringle an do di tingz dem. An mi naa put mi mout a grung an talk, Stacious a bad gyal fi Bridgez!! Killa tell har!! Tell Bridgez seh Stacious wi beat out har whats-it-not!! Bridgez yuh cyaan manage Stacious!! Let it go Bridgez!! LET IT GO!!