STAR SUSS-Wah a gwaan Hot Gal Cherry? A who Etana married to?

What a gwaan people? Hope everybody did have a good week. Happy belated birthday to Kaboom, Mucho Mucho, Nikki Z, Jade (Zip), mine ah next week Monday. November fully tun up! Hahaha. Link me pon hotgalcherry@hotmail.com OR www.twitter.com/hotgalcherry.

Some Ah Oonu Questions Answered:
Reader: Wah a gwaan Hot Gal Cherry? A who Etana married to?

CLICK TO FIND OUT



Me: Etana married to a model and clothing designer yute. Him own a clothing line wha yuh will see her a wear most times.
Reader: I don't think dat dem shud a sen back Zebra go prison. Wat dem shud a do a cut off him manhood. Yeah man cut it off.
Me: My gaawd. Woi, yuh serious sah.
Reader: Is it true dat Cecile is a cougar, cuz me hear say a she an Chris Martin deh? An yes DJ Face fat fi true, an me love di Snow White name dat yuh mek up (for Kartel).
Me: Hahahaha! But wid Cecile, Mi nuh know if dem deh.
Reader: Lisa Hyper & har controversy. Mi naw lie she is a motivation to personalities like har self dedicated to har music bizniz despite circumstances and she full a persistence to. Hyper yuh ah shot.
Me: Mi want a reader fi respond to dis. Hahaha.
Reader: Yo the Richie Loops comment shot ... I agree he is too hype for one song. My Cup and My Cup 2 with a different riddim. Happened to want to work with him and he acted like he was the ..... All now mi cah see why. He has an .... in the cloud attitude an yuh definitely jus put him down to the size he is.
Me: Hahaha! My gaaawd yuh vicious like six snake and 100 biting ants. Hahaha!
Alright people, suss time yah now!


"Mirror, mirror on the wall. Who in the land is fairest of all?" Snow White fi yuh mirror mussi crack mek yuh nuh know say ah nuh you. Inna skin colour, yes, but in dis instance, no. Yuh naw tell di public say ah neva yuh Jay-Z did a talk bout when him mek di mistake pon di foreign station an' say yuh an him did inna studio. Yuh can travel? People out yah ah mad or wha? Jay-Z neva come ah Jamaica fi record wid Kartel and Kartel neva lef di island fi wuk wid Jay-Z an' inna no studio fi three days. Di ongle Jamaican artiste fi work closely wid Jay-Z recently a did Mavado wid di On The Rock remix. Or oonu naw keep track ah di music? So how inna God name ah fi Kartel di man a talk? Wha dem did do, chant and meet inna one studio inna di spiritual realm? If no journalist out yah did practice responsible journalism an' do likkle research oonu wudda realise Jay mek a mistake. Di rapper dem nuh know we like dat, hellooo, so dem can mek mistake an' call a next name especially if a di radio host keep on a say di wrong name. An' Snow White mi disappointed inna yuh too, because yuh mek di story out deh ah spiral outta control an yuh naw say nutten, maybe because it help boost yuh ratings if people nuh know differently. Mi nuh know? Ah dat?
WHY YUH CAN'T USE A CONDOM?
Mi need fi know if dis a really true, say deh artiste yah a breed up pure schoolers an' den a mek dem get abortion. A wha so? Yuh cyaan find older woman, not to mention use one condom? Fren, AIDS cyaan cure enuh. Neida Herpes. So yuh might waah start use condom, and fi di love of God mi hope nutten nuh go so, bout di schoolaz dem yuh a breeed up! Tro man!
BRIDGEZ ... WHY?

Bridgez
People, di whole a we deh pon twitter watch a drama the other night. We see Bridgez tweet say her fans should tell her what songs they want her to perform at Galdiez dance. Now talk di truth wha God love. Fans? Songs? Yow, me cyaan badda again to backfoot, I swear. Di ongle horror musical me see yuh star inna ah did di Roll Out song wid yuh an' Killa. An' ah cudden dat yuh waah come slay we wid ah do show. Have mercy man. Have mercy pon we, a Christmas time. Halloween gone already fren.
Oonu big up oonuself: Tony Gallimore big up yuhself. Mi hear yuh pon Newstalk a blaze up wha day yah. Raga gone from ovah deh but yuh show still a shot. Big up yuhself mi dadz. Pebblez, Shavel, Kirk, Mr Publicity, CJay, Mi nuh know yuh name, but yuh lef di ting wha say "Gaza to di Werl",Venese from May Pen, Ashella from Seaview, Fluffy Diva Shanique from Thatch Walk District inna St. Elizabeth and Tanika and Nicketa and the whole Fluffy family, Blanch, Shantel, Meli Boo, big up oonuself straight!



SOURCE :Jamaica Star